சென்னை மெட்ரோ ரயில் நிலையங்களில் மாற்றுத்திறனாளிகளுக்கான 2-ம் கட்ட வசதி: உயர்நீதிமன்றத்தில் அரசு உறுதி | மாற்றுத்திறனாளிகளுக்கான வசதிகளுடன் மெட்ரோ ரயில் நிலையங்கள் கட்டப்படும்: தமிழக அரசு
சென்னை: இரண்டாம் கட்டமாக, மாற்றுத்திறனாளிகள் பயன்பாட்டிற்கு அனைத்து வசதிகளுடன் சென்னை மெட்ரோ ரயில் நிலையங்கள் கட்டப்படும் என சென்னை உயர்நீதிமன்றத்தில் தமிழக அரசு உறுதியளித்துள்ளது.
சென்னையில் புதிதாக கட்டப்பட்டது மெட்ரோ நிலையங்களில் மாற்றுத்திறனாளிகளுக்கு சாய்வுதளம் அமைக்க தமிழக அரசுக்கு உத்தரவிடக் கோரி வைஷ்ணவி ஜெயக்குமார் சென்னை உயர்நீதிமன்றத்தில் பொதுநல மனு தாக்கல் செய்திருந்தார். இந்த வழக்கு தலைமை நீதிபதி மகாதேவன், நீதிபதி முகமது ஷபிக் ஆகியோர் அடங்கிய அமர்வு முன்பு செவ்வாய்க்கிழமை விசாரணைக்கு வந்தது.
மனுதாரர் வக்கீல் யோகேஸ்வரன் கூறும்போது, “மெட்ரோ ரயில் நிலையங்களில் சாய்வுதள வசதிகள் ஏற்படுத்தப்பட்டுள்ளதாக 2017ம் ஆண்டு அறிக்கையில் கூறப்பட்டுள்ளது. இருப்பினும், 2020 இல் வெளியிடப்பட்ட கூடுதல் அறிக்கைகளில், 40 சதவீதம் மட்டுமே முடிக்கப்பட்டுள்ளது. சக்கர நாற்காலிகள் இருந்தும், பாதாள தளத்தில் இயங்கும் மெட்ரோ ரயில் நிலையங்களில் மாற்றுத்திறனாளிகள் அவற்றை பயன்படுத்த முடிவதில்லை,” என குற்றம் சாட்டினார்.
அப்போது, தமிழக அரசு தரப்பில் ஆஜரான வழக்கறிஞர் பி.எஸ்.ராமன், ”தற்போது சென்னையில் இரண்டாம் கட்ட மெட்ரோ பணிகள் நடந்து வருகிறது. தற்போதுள்ள மெட்ரோ ரயில் நிலையங்களில் பெட்டிகள் மற்றும் நடைமேடைகளுக்கு இடையே உள்ள இடைவெளியைக் குறைக்க செய்யப்படும் மாற்றங்கள் முழு கட்டுமானத்திலும் தாக்கத்தை ஏற்படுத்தும். எனவே, இரண்டாம் கட்ட மெட்ரோ ரயில் நிலையங்கள் மாற்றுத்திறனாளிகள் பயன்படுத்தும் வகையில் அனைத்து வசதிகளுடன் கட்டப்படும்,” என உறுதி அளித்தார். இதைப் பதிவு செய்த நீதிபதிகள், இது தொடர்பாக அரசு அறிக்கை தாக்கல் செய்ய உத்தரவிட்டு விசாரணையை ஒத்திவைத்தனர்.
